Sipas raportit të ri të Qendrës Evropiane për Parandalimin dhe Kontrollin e Sëmundjeve (ECDC), rastet e gripit po zbulohen 3 deri në 4 javë më herët në vendet e BE-së, Islandë, Lihtenshtajn dhe Norvegji.
Përhapjen po e nxit një shtam i ri i influencës A, i njohur si H3N2 subclade K, i cili është regjistruar edhe në Mbretërinë e Bashkuar.
ECDC paralajmëron se sezoni mund të jetë më i rëndë nëse infeksionet rriten dhe vaksinimi mbetet në nivele të ulëta, shkruan Euronews përcjell Gazeta Shneta.
“Po shohim rritje të hershme të rasteve dhe koha është kritike,” tha Edoardo Colzani, ekspert i viruseve respiratore në ECDC.
Ai bëri thirrje për vaksinim sa më shpejt, veçanërisht për grupet në rrezik: të moshuarit, gratë shtatzëna, personat me sëmundje kronike, të imunokompromentuarit, punonjësit shëndetësorë dhe banorët e institucioneve të kujdesit afatgjatë.
Edhe pse vaksina e këtij viti përfshin një variant të H3N2, nuk dihet ende sa mbrojtëse është ndaj nënvariantit të ri.
Megjithatë, autoritetet theksojnë se vaksinimi mbetet mënyra më efektive për të reduktuar rastet e rënda dhe barrën mbi spitalet gjatë dimrit.
ECDC rekomandon gjithashtu masa shtesë në klinika dhe qendra kujdesi afatgjatë, si përdorimi i maskave kur qarkullimi i virusit është i lartë./Gazeta Shneta/