Një studim i ri nga Universiteti i British Columbia paralajmëron se paketat orale të nikotinës, të njohura si nicotine pouches, po shfaqen në TikTok si një trend i këndshëm dhe modern, duke tërhequr sidomos të rinjtë.
Sipas autores së studimit, Dr. Laura Struik, këto produkte janë krijuar fillimisht për t’i ndihmuar njerëzit të lënë duhanin, por në rrjetin social TikTok po paraqiten si pjesë e një “stili jete”, ku përdorimi i tyre shihet si argëtim dhe pjesë e identitetit të të rinjve, shkruan MedicalXpress transmeton Gazeta Shneta.
Hulumtimi analizoi 250 video në TikTok, të cilat kanë gjeneruar mbi 16 milionë pëlqime dhe qindra mijëra komente e shpërndarje. Shumica e videove i paraqisnin paketat e nikotinës – sidomos markën Zyn – si produkte të lehta për t’u përdorur, diskrete dhe të përshtatshme për çdo aktivitet të përditshëm.
Dr. Struik thotë se një qasje e tillë është shqetësuese, pasi përdorimi i hershëm i nikotinës mund të çojë në varësi dhe probleme serioze shëndetësore. Pavarësisht kësaj, vetëm rreth 6% e videove në TikTok përmendnin rreziqet, si:
• dëmtimi i mishrave të dhëmbëve,
• prishja e dhëmbëve,
• rritja e baktereve të dëmshme në gojë,
• rreziku për kancer oral,
• probleme kardiake.
Studimi thekson se industria e duhanit po e shfrytëzon fuqinë e rrjeteve sociale për të normalizuar këto produkte tek të rinjtë – një grup i ndjeshëm dhe me rrezik të lartë për t’u bërë të varur.
“Këto nuk janë produkte për lënien e duhanit; janë nxitës të rinj të varësisë ndaj nikotinës,” paralajmëron Dr. Struik, duke shtuar se trendi në rritje do të jetë një sfidë afatgjatë për shëndetin publik.