Një studim i ri i publikuar në revistën Microbiome ka zbuluar se ajri në kabinat e aeroplanëve dhe në ambientet spitalore është përgjithësisht i sigurt dhe përmban kryesisht mikrobe të padëmshme, të ngjashme me ato që gjenden në lëkurën e njeriut.
Studiuesit analizuan ndotësit mikrobialë të mbledhur nga pjesa e jashtme e maskave të udhëtarëve dhe punonjësve shëndetësorë, si dhe nga një filtër kabine të një aeroplani, i përdorur për më shumë se 8 mijë orë.
Në total u identifikuan 407 lloje mikroorganizmash, shumica prej tyre të padëmshëm. Vetëm një numër shumë i vogël i baktereve potencialisht të rrezikshme u zbulua, pa shenja të infeksioneve aktive.
Sipas autores kryesore të studimit, Prof. Erica Hartmann nga Universiteti Northwestern, rezultatet tregojnë se “ajri i brendshëm zakonisht reflekton mikrobe të burimit njerëzor, kryesisht nga lëkura.”
Studimi lindi gjatë pandemisë së COVID-19, kur ishin të larta shqetësimet për transmetimin e virusit në aeroplanë. Për shkak të kostos së lartë të zëvendësimit të filtrave HEPA në aeroplanë, ekipi vendosi të përdorë maskat si mjet më të thjeshtë dhe më të lirë për mbledhjen e mostrave të ajrit.