Një teknologji e re mjekësore po hap rrugën drejt ndërhyrjeve shumë më të sigurta, duke u mundësuar kirurgëve të ushtrojnë operacionet në mënyrë virtuale para se të futen në sallë.
Përmes modeleve tredimensionale të organeve, të krijuara nga skanimet MRI dhe CT, mjekët tani mund të eksplorojnë çdo detaj të trupit të pacientit me syze të realitetit virtual, shkruan Euronews, transmeton Gazeta Shneta.
Këto modele u lejojnë atyre të shohin anomali të fshehura, të kuptojnë më mirë strukturën anatomike dhe të ndërtojnë strategjinë e operimit me saktësi shumë më të lartë.
Teknologjia funksionon duke gjeneruar një organ të plotë 3D të cilin kirurgu mund ta rrotullojë, ta zmadhojë dhe madje ta presë me mjete virtuale, ashtu si do të vepronte gjatë operacionit real. Në këtë mënyrë ndërhyrjet më të rrezikshme, si operacionet e zemrës, të trurit apo tumorëve të thellë, mund të simulohen më parë për të shmangur komplikimet që zakonisht shfaqen papritur gjatë procedurës.
Sipas specialistëve, mundësia për të provuar një operacion paraprakisht pritet të reduktojë rrezikun për pacientët, të shkurtojë kohën e operimit dhe të rrisë normën e suksesit në rastet më të ndërlikuara. Disa spitale në Evropë dhe SHBA tashmë e kanë testuar këtë teknologji dhe rezultatet fillestare tregojnë një rritje të ndjeshme të sigurisë dhe efikasitetit në sallën e operacionit.
Hulumtuesit theksojnë se integrimi i realitetit virtual, hologramave dhe inteligjencës artificiale në mjekësi është vetëm fillimi i një epoke të re, ku kirurgjia do të jetë më e personalizuar, më precize dhe shumë më pak e rrezikshme për pacientët. /Gazeta Shneta/