Njësitë Antikontrabandë të Doganës së Kosovës kanë zbuluar një rast të shitjes së barnave ilegale gjatë një aksioni kontrolli në një barnatore në qytetin e Ferizajt.
Gjatë kontrollit, doganierët konstatuan se në këtë subjekt farmaceutik po qarkullonin barna pa banderola dhe pa u futur përmes procedurave të rregullta doganore.
Sipas njoftimit, janë sekuestruar 153 artikuj medicionalë të llojeve të ndryshme, përfshirë barna që lëshohen vetëm me recetë, preparate për trajtimin e sëmundjeve kronike, produkte dermatologjike, antiepileptikë, antihipertensivë dhe medikamente të tjera të ndjeshme për shëndetin publik.
Tutje Dogana njofton se malli i konfiskuar është dërguar në depot doganore për trajtim të mëtejshëm, ndërsa rasti është iniciuar si kundërvajtje doganore në bazë të Kodit Doganor dhe të Akcizave të Republikës së Kosovës./Gazeta Shneta/
