Një hetim i ri paralajmëron se rregullat e dobëta të transparencës në Bashkimin Evropian kanë lejuar kompanitë e duhanit të ndikojnë në mënyrë të heshtur proceset vendimmarrëse në Bruksel.
Sipas raportit të organizatës globale mbikëqyrëse STOP dhe grupit francez kundër duhanit Contre-Feu, Komisioni Evropian ka dështuar të respektojë standardet e veta të transparencës në marrëdhëniet me industrinë e duhanit, raporton Euronews Health transmeton Gazeta Shneta.
Ky hetim tregon se institucionet evropiane kanë zhvilluar takime të padeklaruara me përfaqësues të industrisë, në kundërshtim të dukshëm me rregullat ekzistuese.
Ndërsa Komisioni ka deklaruar vetëm pesë takime me industrinë e duhanit midis viteve 2023–2025, u zbulua se Drejtoria e Përgjithshme për Tregtinë ka zhvilluar të paktën tetë takime të tjera gjatë viteve 2023 dhe 2024, të cilat nuk u regjistruan në Regjistrin e Transparencës.
Sipas rregullave aktuale, vetëm zyrtarët e lartë janë të detyruar të regjistrojnë takimet, duke krijuar hapësira që, sipas organizatave të transparencës, shfrytëzohen rregullisht nga industria e duhanit.
Edhe Avokati i Popullit Evropian ka kritikuar më herët mungesën e transparencës dhe mosmbajtjen e procesverbaleve të takimeve.
Raporti thekson gjithashtu rolin e Philip Morris International, e cila dyshohet se ka tentuar të ndikojë politikat tregtare të BE-së, veçanërisht lidhur me produktet e reja të duhanit dhe nikotinës.
Megjithëse Komisioni Evropian deklaron se shmang takimet me industrinë, përveç rasteve “rreptësisht të nevojshme”, organizatat mbikëqyrëse paralajmërojnë se lobimi i duhanit mbetet i përhapur dhe me ndikim të madh në politikat e BE-së. /Gazeta Shneta/