Pijet energjike janë jashtëzakonisht të përhapura, veçanërisht tek të rinjtë, por së fundmi kanë tërhequr vëmendje për shkak të disa titujve alarmantë mbi ndikimin e tyre të mundshëm në shëndet.
Lajme që paralajmërojnë për një lidhje mes pijeve energjike dhe rrezikut të kancerit kanë ngritur shqetësime, duke u bazuar në një studim të publikuar në revistën shkencore “Nature”.
Studimi në fjalë shqyrtoi lidhjen mes leukemisë, një lloj kanceri i gjakut, dhe taurines – një aminoacid natyral që gjendet në shumë pije energjike si Red Bull.
Megjithatë, autorja kryesore e studimit, Dr. Jeevisha Bajaj, profesoreshë në Universitetin e Rochester në Nju Jork, ka sqaruar se gjetjet nuk nënkuptojnë se konsumimi i taurines rrit rrezikun e zhvillimit të leukemisë, siç është interpretuar në disa media.
Në fakt, studimi nuk përfshiu fare njerëz. Hulumtimi u krye përmes eksperimenteve laboratorike te minjtë.
Rezultatet treguan se në këto modele shtazore, qelizat e leukemisë janë në gjendje të përdorin taurinen për të nxitur rritjen e tyre, duke e bërë sëmundjen më agresive. Kjo, sipas studiuesve, është shumë ndryshe nga ideja se taurina shkakton kancer.
“Ne nuk i dhamë taurinë minjve apo njerëzve të shëndetshëm për të parë nëse zhvillonin leukemi. Nuk kemi prova që taurina shkakton kancer,” theksoi Bajaj.
Përkundrazi, studimi hap mundësi të reja kërkimore. Sipas autores, bllokimi i mënyrës se si qelizat kancerogjene përdorin taurinen mund të shërbejë si një qasje e re premtuese për trajtimin e leukemisë, megjithëse nevojiten studime të mëtejshme për ta konfirmuar këtë. /Gazeta Shneta/