Në një realitet ku ritmi i jetës bëhet gjithnjë e më i shpejtë dhe tundimi për të sakrifikuar gjumin është i madh, ekspertët japin një mesazh të qartë: mos i hyr në hak gjumit. Edhe pse një serial interesant apo një libër i parezistueshëm mund të të mbajë zgjuar deri vonë, orët e gjumit janë thelbësore për mirëqenien fizike dhe emocionale.
Gjumi cilësor është tashmë sinonim i shëndetit mendor. Këtë e konfirmon edhe një studim i Universitetit të Kembrixhit, sipas të cilit personat që flenë nga 7 deri në 9 orë në natë arrijnë të reduktojnë ndjeshëm nivelin e trishtimit të përgjithshëm, deri në 22%. Ky interval konsiderohet optimal për funksionimin e trurit dhe stabilitetin emocional.
Përfitimet e gjumit të mirë nuk ndalen vetëm te humori. Gjithashtu ndihmon trupin të luftojë sëmundjet e zakonshme, forcon sistemin imunitar dhe përmirëson ndjeshëm cilësinë e jetës.
Ekspertët theksojnë se edhe pse procesi i ëndërrimit mbetet ende pjesërisht mister, roli i tij në përpunimin e emocioneve dhe përvojave të përditshme është vendimtar.
Megjithatë, si mungesa ashtu edhe teprica e gjumit mund të kenë pasoja negative.
Hulumtimet tregojnë se gjumi i pakët apo i tepërt ndikon negativisht si në trup, ashtu edhe në mendje, duke rritur rrezikun për probleme shëndetësore dhe çrregullime emocionale.
Prandaj, balanca mbetet çelësi i një jete të shëndetshme. /Gazeta Shneta/