Ashwagandha është një bimë mjekësore e përdorur prej shekujsh në mjekësinë Ayurvedike indiane për menaxhimin e stresit. Studimet shkencore sugjerojnë se mund të ndihmojë në uljen e stresit, përmirësimin e gjumit dhe rritjen e përqendrimit, megjithëse nevojiten ende kërkime të mëtejshme për të konfirmuar plotësisht këto përfitime.
Sipas burimit Very Well Health, ashwagandha konsiderohet një adaptogjen, që do të thotë se ndihmon trupin të përshtatet më mirë ndaj stresit. Mes tjerash, vepron në disa sisteme të trupit, përfshirë sistemin nervor dhe hormonal, duke ndikuar pozitivisht në reagimin e trurit ndaj stresit.
Një nga mekanizmat kryesorë është ulja e kortizolit, hormonit të stresit. Nivelet e larta të kortizolit për periudha të gjata lidhen me ankthin, tensionin, shtimin në peshë dhe probleme të tjera shëndetësore. Studime klinike kanë treguar se përdorimi i ashwagandhës për disa javë mund të ulë ndjeshëm kortizolin dhe ndjenjën e stresit.
Një tjetër përfitim i rëndësishëm është përmirësimi i gjumit. Ankthi shpesh shoqërohet me pagjumësi, ndërsa ashwagandha mund të ndihmojë në relaksimin e sistemit nervor dhe në rregullimin e ciklit gjumë–zgjim, duke ndihmuar njerëzit të flenë më shpejt dhe më gjatë.
Gjithashtu, kërkimet tregojnë se ashëagandha mund të përmirësojë përqendrimin dhe kujtesën, duke e bërë më të lehtë fokusimin në detyrat e përditshme. Dozat e përdorura zakonisht për ankth dhe stres variojnë nga 300 deri në 600 mg në ditë.
Megjithëse ashwagandha konsiderohet përgjithësisht e sigurt për përdorim afatshkurtër, mund të ketë efekte anësore. Prandaj, rekomandohet konsultimi me një profesionist shëndetësor, veçanërisht për gratë shtatzëna, personat me sëmundje ekzistuese ose ata që marrin medikamente të tjera. /Gazeta Shneta/