Ushtrimet fizike njihen gjerësisht për përfitimet e tyre në shëndetin e zemrës, por studime të reja tregojnë se ato mund të kenë ndikim edhe në parandalimin dhe ngadalësimin e kancerit. Një studim i fundit nga Universiteti i Newcastle ka zbuluar se vetëm 10–12 minuta ushtrime intensive mund të ndihmojnë në ngadalësimin e rritjes së qelizave të kancerit kolorektal.
Studiuesit analizuan ndikimin e aktivitetit fizik në nivel molekular, duke u bazuar në prova të mëparshme që sugjeronin se ushtrimet ofrojnë mbrojtje kundër kancerit. Një nga gjetjet kryesore ishte se një seancë e vetme ushtrimesh intensive ndihmon trupin të riparojë më shpejt dëmtimet e ADN-së, një faktor kyç në zhvillimin e kancerit, shkruan burimi Medical News Today transmeton Gazeta Shneta.
Në studim u përfshinë 30 të rritur të moshës 50–78 vjeç, të cilët ishin mbipeshë ose obezë, por ndryshe të shëndetshëm. Këta pjesëmarrës u zgjodhën sepse, sipas autorëve, njerëzit me obezitet dhe ata me kancer shfaqin reagime molekulare të ngjashme ndaj ushtrimeve.
Mostrat e gjakut u morën para dhe pas ushtrimit, dhe serumi i tyre u testua mbi qeliza kancerogjene në laborator.
Rezultatet treguan se serumi i gjakut pas ushtrimit shkaktoi ndryshime në aktivitetin e mbi 1,300 gjeneve të lidhura me rritjen dhe riparimin qelizor.
Ushtrimi përbëhej nga një seancë e shkurtër biçiklete me intensitet të lartë, ku rezistenca rritej gradualisht deri në përpjekje maksimale.
Megjithëse studimi nuk dëshmon se ushtrimet e kurojnë kancerin, por shpjegon mekanizmat përmes të cilëve aktiviteti fizik mund të ndihmojë në mbrojtjen kundër kancerit kolorektal.
Gjetjet u publikuan në “International Journal of Cancer”. /Gazeta Shneta/