Konsumimi i më shumë se 400 mg kafeinë në shumicën e ditëve të javës mund të rrisë rrezikun e sëmundjeve kardiovaskulare edhe te individët e shëndetshëm, sugjeron një studim i ri shkencor.
Konsumimi kronik i kafeinës u përkufizua si përdorimi i rregullt i pijeve me kafeinë, si kafeja, çaji dhe pijet e gazuara, të paktën pesë ditë në javë për më shumë se një vit. Studimi përfshiu 92 individë të shëndetshëm, të moshës 18 deri në 45 vjeç, të cilët kishin presion normal të gjakut, shkruan burimi Health News transmeton Gazeta Shneta.
Pjesëmarrësve iu mat presioni i gjakut dhe pulsi para dhe pas një testi treminutësh hapash, i cili vlerëson aftësinë aerobike përmes shpejtësisë së rikuperimit të rrahjeve të zemrës pas aktivitetit fizik.
Gjithashtu, u mblodhën të dhëna sociodemografike dhe informacione mbi sasinë ditore të kafeinës së konsumuar.
Rezultatet treguan se 19.6% e pjesëmarrësve konsumonin më shumë se 400 mg kafeinë në ditë, që përkon me rreth katër filxhanë kafe, tetë filxhanë çaj të zi, dhjetë kanaçe pije të gazuara ose dy pije energjike.
Konsumimi i lartë dhe afatgjatë i kafeinës u shoqërua me ndikim të dukshëm në sistemin nervor autonom, duke çuar në rritje të rrahjeve të zemrës dhe presionit të gjakut me kalimin e kohës.
Marrja më e lartë e kafeinës u vu re veçanërisht te gratë, personat e punësuar në pozita biznesi dhe menaxheriale, si dhe te ata që jetonin në zona urbane.
Presioni i lartë i gjakut dobëson zemrën gradualisht dhe përbën një faktor kryesor rreziku për sëmundjet e zemrës, sidomos kur kombinohet me faktorë të tjerë si pirja e duhanit, konsumimi i alkoolit apo historia familjare.
Ekspertët theksojnë se ndonëse konsumimi i moderuar i kafesë dhe çajit mund të ketë përfitime shëndetësore, është e rëndësishme të respektohen kufijtë e rekomanduar për të shmangur efektet anësore si pagjumësia, ankthi, rrahjet e shpejta të zemrës, të përzierat dhe dhimbjet e kokës. /Gazeta Shneta/