Me kalimin e viteve, forca dhe lëvizshmëria e trupit bien, kryesisht për shkak të humbjes graduale të masës muskulore.
Që nga mosha 30 vjeç, masa muskulore zvogëlohet me rreth 3–8% për dekadë, ndërsa pas moshës 60 vjeç ky proces përshpejtohet. Edhe pse humbja e muskujve nuk mund të parandalohet plotësisht, një stil jete aktiv – veçanërisht ushtrimet e forcës – mund ta ngadalësojë ndjeshëm dhe të ndihmojë njerëzit të mbeten të pavarur dhe funksionalë për më gjatë, shkruan burimi Medical News Today transmeton Gazeta Shneta.
Një studim i ri, i botuar në “PNAS”, ka zbuluar mekanizmin molekular që shpjegon pse ushtrimet janë kaq të rëndësishme për ruajtjen e muskujve.
Studiuesit kanë zbuluar se aktiviteti fizik frenon një faktor transkriptimi të quajtur “DEAF1”, i cili me moshën rritet dhe çon në çrregullim të proteinave dhe dobësim të muskujve. Në të njëjtën kohë, ushtrimet aktivizojnë proteina dhe gjene mbrojtëse që nxisin riparimin dhe rigjenerimin e qelizave muskulore.
Sipas autorit kryesor të studimit, Tang Hong-Wen, ushtrimet aktivizojnë gjenet FOXO, të cilat veprojnë si “frenë” për DEAF1. Kjo i ndihmon qelizat muskulore të pastrojnë proteinat e dëmtuara dhe të rikthejnë ekuilibrin mes rritjes dhe mirëmbajtjes.
Ekspertët theksojnë se ushtrimet rezistente (si peshat) janë veçanërisht efektive, pasi ofrojnë sinjalin më të fortë molekular për riparim dhe ruajtje afatgjatë të shëndetit të muskujve gjatë plakjes. /Gazeta Shneta/