Vitamina D është një lëndë ushqyese thelbësore për shëndetin e përgjithshëm të trupit. Edhe pse njihet kryesisht për rolin e saj në forcimin e kockave, ajo ndihmon gjithashtu sistemin imunitar, funksionin muskulor, metabolizmin dhe shëndetin e trurit.
Megjithatë, studime të mëparshme tregojnë se deri në 1 miliard njerëz në mbarë botën vuajnë nga mungesa e vitaminës D, duke rritur rrezikun për probleme të ndryshme shëndetësore, shkruan burimi Medical News Today transmeton Gazeta Shneta.
Një studim i ri i publikuar në “The American Journal of Clinical Nutrition”, ka gjetur një lidhje të fortë mes mungesës së vitaminës D dhe rrezikut më të lartë për shtrime në spital për shkak të infeksioneve të traktit respirator, si bronkiti dhe pneumonia.
Studiuesit analizuan të dhënat shëndetësore të mbi 36,000 personave të moshës 40–69 vjeç nga databaza ‘UK Biobank’. Nivelet e vitaminës D u matën përmes analizave të gjakut, ku mungesa e rëndë u përcaktua si nivel 15 nmol/L ose më pak.
Rezultatet treguan se individët me mungesë të theksuar të vitaminës D kishin 33% më shumë rrezik të shtroheshin në spital për infeksione të frymëmarrjes krahasuar me ata që kishin nivele të mjaftueshme (75 nmol/L ose më shumë). Për më tepër, për çdo rritje prej 10 nmol/L të vitaminës D, rreziku i shtrimit në spital ulej me 4%.
Sipas autores kryesore të studimit, Abi Bournot, këto gjetje theksojnë rëndësinë e ndërgjegjësimit publik për ruajtjen e niveleve të shëndetshme të vitaminës D.
Ajo thekson se suplementet, veçanërisht gjatë muajve të dimrit, mund të jenë të dobishme, sidomos për të moshuarit dhe komunitetet me rrezik të lartë për mungesë të vitaminës D. /Gazeta Shneta/