Largimi i një sasie të vogël kripe nga buka, sanduiçet apo pica mund të mos vihet re nga shija, por mund të ketë një ndikim të madh në shëndetin e zemrës. Dy studime të reja evropiane tregojnë se ulja e natriumit në ushqimet e përpunuara dhe të gatshme mund të parandalojë mijëra sëmundje dhe vdekje kardiovaskulare në Francë dhe Mbretërinë e Bashkuar.
Sipas hulumtimeve të publikuara në revistën “Hypertension”, reduktimi i kripës në bukë dhe produkte të ngjashme mund të shpëtojë rreth 1,200 jetë në vit në Francë. Ndërkohë, në Mbretërinë e Bashkuar, arritja e objektivave kombëtare për uljen e kripës mund të parandalojë rreth 100,000 raste sëmundjesh të zemrës dhe 25,000 goditje në tru gjatë 20 viteve, shkruan burimi Health Day transmeton Gazeta Shneta.
Kripa ndikon drejtpërdrejt në rritjen e tensionit të gjakut, pasi natriumi bën që trupi të mbajë më shumë ujë, duke rritur presionin në enët e gjakut.
Shoqata Amerikane e Zemrës rekomandon jo më shumë se 2,300 mg natrium në ditë, ndërsa niveli ideal është nën 1,500 mg, veçanërisht për personat me tension të lartë.
Studimi francez analizoi një marrëveshje vullnetare të vitit 2022 mes qeverisë dhe prodhuesve të bukës për uljen e kripës. Deri në vitin 2023, shumica e bukëve në Francë kishin përmbushur standardet e reja, duke ulur marrjen ditore të kripës me rreth 350 mg.
Kjo solli një rënie të ndjeshme të vdekjeve dhe shtrimeve në spital për sëmundje të zemrës dhe goditje në tru.
Studiuesit theksojnë se kjo qasje është veçanërisht efektive sepse nuk kërkon ndryshim të sjelljes individuale. Ndryshime të vogla dhe “të padukshme” në përbërjen e ushqimeve mund të sjellin përfitime të mëdha për shëndetin publik. /Gazeta Shneta/