Një studim i ri ka zbuluar se vaksina BCG, e përdorur prej më shumë se një shekulli për parandalimin e tuberkulozit, mund të ketë efekte shumë më të gjera sesa mendohej deri më tani.
Sipas hulumtimit, vaksina është në gjendje të “riprogramojë” sistemin imunitar, duke ndryshuar mënyrën se si qelizat imunitare reagojnë edhe brenda trurit. Studiuesit besojnë se ky mekanizëm mund të ndihmojë në mbrojtjen nga proceset inflamatore që lidhen me sëmundje neurologjike dhe neurodegjenerative.
Ekspertët shpjegojnë se BCG nuk vepron vetëm kundër bakterit që shkakton tuberkulozin, por nxit edhe atë që quhet “imunitet i trajnuar” (trained immunity), duke e bërë sistemin imunitar më të përgatitur për t’u përballur me kërcënime të ndryshme. Ky efekt mund të ndikojë edhe në qelizat mbrojtëse të trurit, duke përmirësuar reagimin e tyre ndaj dëmtimeve dhe inflamacionit.
Megjithatë, autorët theksojnë se rezultatet janë ende në fazat e hershme të kërkimit dhe nuk nënkuptojnë se vaksina BCG mund të përdoret menjëherë si trajtim për sëmundjet e trurit. Përpara se kjo të ndodhë, nevojiten studime të tjera dhe prova klinike te njerëzit për të konfirmuar sigurinë dhe efektivitetin e kësaj qasjeje.
Nëse këto rezultate konfirmohen në studimet e ardhshme, BCG mund të shërbejë si bazë për zhvillimin e terapive të reja që synojnë forcimin e mbrojtjes natyrore të trurit dhe ngadalësimin e përparimit të sëmundjeve neurologjike.