Ginsengu është një nga suplementet ushqimore më të njohura në botë, i njohur për vetitë antioksiduese, anti-inflamatore dhe potencialin kundër kancerit. Një studim i fundit nga “Universiteti Oberta de Catalunya (UOC)”, i publikuar në revistën “Nutrients”, tregon se ky suplement mund të ofrojë përfitime të konsiderueshme edhe për ata që ushtrojnë rregullisht.
Sipas burimit Medical Xpress, studiuesit analizuan mbi 700 artikuj shkencorë dhe zbuluan se marrja e ginsengut ndihmon në uljen e lodhjes dhe përmirëson rigjenerimin e muskujve pas aktivitetit fizik.
“Ginsengu mund të luajë një rol të rëndësishëm si suplement rikuperues pas stërvitjes,” tha Borja Muñoz, bashkautor i studimit dhe trajner fitnesi.
Përbërësit aktivë të ginsengut veprojnë si stimulues të sistemit nervor qendror, duke rregulluar kortizolin, hormonin e stresit, dhe duke mbështetur funksionet metabolike dhe imunitare të trupit.
Mes tjerash, gjithashtu ndihmon në zvogëlimin e dëmtimit inflamator të muskujve, duke ndikuar në tregues biologjikë si kreatinë kinaza (CK) dhe interleukina-6 (IL-6), dhe ul nivelin e laktatit në gjak, që shkakton lodhje gjatë stërvitjes intensive.
Konsumi i rregullt i ginsengut, në mungesë kundërindikacionesh mjekësore, mund të përmirësojë performancën fizike, të lehtësojë rikuperimin pas stërvitjes dhe të ulë rrezikun e lëndimeve të muskujve dhe ligamenteve.
Për këtë arsye, konsiderohet veçanërisht i dobishëm për sportistët dhe për të gjithë ata që ushtrohen rregullisht, duke e bërë një suplement të vlefshëm për shëndetin dhe energjinë trupore. /Gazeta Shneta/