Një studim i ri paralajmëron se nëse shkurtimet aktuale të ndihmës ndërkombëtare për zhvillim vazhdojnë, rreth 22.6 milion njerëz në 93 vende me të ardhura të ulëta dhe të mesme mund të vdesin deri në vitin 2030, përfshirë 5.4 milion fëmijë nën pesë vjeç.
Në vitin 2023, ndihma zyrtare për zhvillim (ODA) arriti nivelin rekord prej 250.3 miliardë dollarësh, me Francën, Gjermaninë, Japoninë, Mbretërinë e Bashkuar dhe Shtetet e Bashkuara që siguronin rreth 70% të saj, raporton burimi Euronews Health transmeton Gazeta Shneta.
Megjithatë, të gjithë këta donatorë kryesorë, përveç Japonisë, reduktuan kontributet e tyre në 2024, duke shënuar rënien e parë të ndihmës globale pas gjashtë vjetësh. Shtetet e Bashkuara u bënë vendi i parë që shpërbëri agjencinë e saj për zhvillim ndërkombëtar (USAID) në 2025 dhe vendet e tjera pasuan shembullin.
Studimi i publikuar në “The Lancet”, tregon se programet ‘ODA’ kanë ndihmuar më parë në uljen e mortalitetit të fëmijëve me 39%, parandalimin e vdekjeve nga HIV/AIDS me 70% dhe zvogëlimin e vdekjeve nga malaria dhe kequshqyerja me 56%.
Shkurtimet e vazhdueshme mund të çojnë në 9.4 milion vdekje të parandalueshme në një skenar të butë dhe 22.6 milion në një skenar më të rëndë, duke rrezikuar progresin e dy dekadave në shëndetin global.
Përveç ndikimit në shëndetin publik, këto shkurtime kufizojnë numrin e mjekëve dhe shkëmbimin e informacionit midis vendeve, duke rritur rrezikun nga epidemitë dhe katastrofat klimatike.
Ekspertët theksojnë se ndihma ndërkombëtare shpëton jetë dhe sjell stabilitet dhe prosperitet që përfitojnë të gjithë. /Gazeta Shneta/