Aborti, i njohur edhe si ndërprerje e shtatzënisë, është procesi i përfundimit të një shtatzënie. Ndërsa, për dallim nga kjo, ekziston edhe aborti spontan që ndodh kur shtatzënia përfundon natyrshëm, pa ndërhyrje mjekësore.
Arsyet pse një grua mund të zgjedhë abortin janë të shumta dhe vendimi është thellësisht personal.
Shtatzënia mund të jetë e paplanifikuar, kushtet personale apo financiare mund të mos lejojnë rritjen e një fëmije, mund të ketë dhunë në marrëdhënie, ose thjesht mund të mos jetë momenti i duhur për të pasur një fëmijë.
Në disa raste, zbulohet se fetusi ka probleme shëndetësore, ose vazhdimi i shtatzënisë paraqet rrezik për shëndetin e gruas. Cilado qoftë arsyeja, zgjedhja për të vazhduar ose jo shtatzëninë, i përket individit.
Sa më herët të flisni me mjekun për abortin, aq më shumë mundësi do të keni.
Abortet medikamentoze janë të mundshme deri në javën e 9-të të shtatzënisë, ndërsa deri në javën e 14-të mund të kryhet një procedurë e thjeshtë kirurgjikale. Pas kësaj periudhe, përdoren metoda të tjera mjekësore dhe ligjore.
Pilula “e mëngjesit” apo emergjente ndryshon nga aborti, pasi ajo parandalon shtatzëninë përpara se të fillojë, ndërsa aborti e përfundon atë pasi ka nisur. /Gazeta Shneta/