Fruthi vazhdon të mbetet një problem serioz shëndetësor në Evropë, pavarësisht rënies së rasteve gjatë vitit 2025 krahasuar me vitin paraprak. Agjencitë shëndetësore paralajmërojnë se hezitimi ndaj vaksinimit po ushqen përhapjen e sëmundjes dhe rreziku i shpërthimeve mbetet i lartë.
Sipas të dhënave, gjatë vitit 2024 në Evropë u raportuan 127,350 raste me fruth – numri më i lartë që nga viti 1997. Edhe pse rastet ranë në vitin 2025, infeksionet mbeten dyfish më të larta krahasuar me vitin 2023, sipas Qendrës Evropiane për Parandalimin dhe Kontrollin e Sëmundjeve (ECDC).
Zyrtarët shëndetësorë theksojnë se Evropa ka një vaksinë shumë efektive dhe të sigurt kundër fruthit, por mbulimi me vaksinim mbetet i pamjaftueshëm në disa vende.
8 në 10 të prekur nuk ishin të vaksinuar, raporton Euronewa Health transmeton Gazeta Shneta.
Sipas ECDC-së, tetë në dhjetë persona që u infektuan me fruth gjatë vitit 2025 nuk kishin marrë vaksinën. Për të parandaluar shpërthimet, të paktën 95 për qind e popullsisë së kualifikuar duhet të marrë dy doza të vaksinës MMR (fruth, shytat dhe rubeola).
Ekspertët theksojnë se vaksinimi nuk është vetëm mbrojtje individuale, por edhe akt solidariteti, pasi mbron personat që nuk mund të vaksinohen për arsye mjekësore dhe fëmijët shumë të vegjël.
Fruthi është një nga viruset më ngjitëse te njerëzit. Një person i infektuar mund të infektojë deri në 18 persona të pavaksinuar, duke e bërë sëmundjen rreth 12 herë më ngjitëse se gripi.
Sëmundja mund të shkaktojë komplikime serioze dhe afatgjata, përfshirë dëmtim të sistemit imunitar, duke e bërë organizmin më të ndjeshëm ndaj infeksioneve të tjera për muaj apo edhe vite.
Nuk ekziston trajtim specifik për fruthin, çka e bën vaksinimin mjetin e vetëm efektiv për parandalim.
Disa vende humbën statusin “pa fruth”
Organizata Botërore e Shëndetësisë (OBSH) ka njoftuar se gjashtë vende evropiane – Armenia, Austria, Azerbajxhani, Spanja, Mbretëria e Bashkuar dhe Uzbekistani – humbën statusin “pa fruth” pas rritjes së rasteve në vitin 2024.
Një vend e humb këtë status nëse transmetimi i virusit vazhdon për më shumë se një vit.
Autoritetet shëndetësore bëjnë thirrje për rritjen e mbulimit me vaksinim dhe luftimin e dezinformatave, duke paralajmëruar se pa veprime të menjëhershme, fëmijët dhe grupet e cenueshme do të vazhdojnë të jenë në rrezik./Gazeta Shneta/