Asociacioni i të Sëmurëve nga Diabeti në Pejë (ASD Peja) ka dhuruar një aparat për matjen e tensionit të syrit në Spitalin e Përgjithshëm të Pejës, duke kontribuar drejtpërdrejt në rritjen e kapaciteteve për diagnostikimin dhe parandalimin e komplikimeve okulare te personat me diabet. Kjo nismë është pjesë e përpjekjeve të vazhdueshme të shoqatës ASD Peja për të forcuar shërbimet parandaluese dhe për të mbështetur pacientët në menaxhimin sa më të mirë të sëmundjes.
Donacioni është realizuar me iniciativën e ASD Peja, në bashkëpunim me Agjencionin për Financim në Kosovë (AFK). Sipas njoftimit zyrtar, drejtori ekzekutiv i shoqatës, z. Idriz Ethemi, ka lobuar dhe ka bashkëpunuar ngushtë me AFK-në për sigurimin e këtij aparati të rëndësishëm për repartin përkatës në spital, raporton Gazeta Shneta.
“Ky donacion është realizuar me iniciativën e ASDP dhe drejtorit ekzekutiv të saj, z. Idriz Ethemi, si dhe me miratimin e Bordit të AFK-së, zyra në Pejë, e kryesuar nga z. Xhevdet Spahija, drejtor i AFK-së. Aparati është pranuar nga drejtori i Spitalit të Përgjithshëm në Pejë, z. Fahri Hasani, në prani të mjekëve dhe personelit shëndetësor”, thuhet ndër të tjera, në njoftimin e ASD Peja.
Ky donacion përfaqëson një hap të rëndësishëm në ngritjen e kapaciteteve diagnostike për zbulimin e hershëm dhe trajtimin e sëmundjeve të syrit që mund të shfaqen si pasojë e diabetit.
ASD Peja, në kuadër të misionit të saj për të qenë gjithmonë pranë pacientëve dhe nevojave të tyre, vazhdon të investojë në iniciativa që ndikojnë drejtpërdrejt në përmirësimin e cilësisë së jetës së personave me diabet.
Donacioni i aparatit për matjen e tensionit të syrit është realizuar me iniciativën e ASD Peja, në bashkëpunim me Agjencionin për Financim në Kosovë (AFK). / Fotografia: ASD Peja
Aparati për matjen e tensionit të syrit (tonometri) përdoret për të matur presionin intraokular, një tregues kyç për diagnostikimin e glaukomës dhe monitorimin e dëmtimeve të mundshme të nervit optik.
Tek personat me diabet, kontrolli i rregullt i syve është thelbësor, pasi nivelet e larta të sheqerit (glukozës) në gjak mund të dëmtojnë enët e vogla të gjakut në retinë, duke shkaktuar retinopati diabetike.
Sipas Organizatës Botërore të Shëndetësisë (OBSH), një pjesë e madhe e këtyre komplikimeve mund të parandalohen ose të ngadalësohen ndjeshëm përmes kontrollit të mirë të sheqerit në gjak, kontrolleve të rregullta oftalmologjike dhe ndërhyrjes së hershme.
Shoqata ASD Peja, vazhdon të jetë e përkushtuar që t’u qëndrojë afër të gjithë qytetarëve të Pejës të diagnostikuar me diabet, duke ofruar mbështetje në ndërgjegjësim, identifikim të hershëm të sëmundjes, këshillim për menaxhimin e saj dhe krijimin e një komuniteti të bashkuar që përballet me sfidat e diabetit në mënyrë të organizuar dhe të informuar. /Gazeta Shneta/