Shërbimet e shëndetit digjital po bëhen gjithnjë e më të rëndësishme në Evropë. Pandemia e COVID-19 i shtyu shumë vende të zhvillojnë ose të zgjerojnë konsultat mjekësore në distancë, dhe që nga ajo kohë telekonsultimet kanë vazhduar të rriten. Një element kyç në këtë transformim është qasja në dosjet elektronike shëndetësore (EHR) dhe niveli i literacisë digjitale të qytetarëve në fushën e shëndetit.
Dosjet elektronike mundësojnë trajtim më të shpejtë, më të sigurt dhe më të koordinuar, ndërsa literacia digjitale ndihmon qytetarët të gjejnë, kuptojnë dhe përdorin informacionin shëndetësor online me besim.
Bashkimi Evropian ka vendosur objektivin që deri në vitin 2030 të gjithë qytetarët e BE-së të kenë qasje në dosjet e tyre elektronike shëndetësore, raporton Euronews Health transmeton Gazeta Shneta.
Sipas raportit të Komisionit Evropian “Digital Decade 2025: eHealth Indicator Study”, niveli i qasjes në EHR në BE arriti në 83% në vitin 2024, një rritje nga 79% në vitin 2023 dhe 72% në vitin 2022.
Megjithatë, dallimet mes vendeve mbeten të mëdha. Belgjika dhe Estonia kryesojnë me 100%, të ndjekura nga Danimarka (98%), Lituania (95%), Malta (94%), Polonia (92%) dhe Norvegjia (91%). Ndërkohë, Irlanda renditet e fundit me vetëm 25%, pasi është i vetmi vend i BE-së që ende nuk ofron portal online për qasje në të dhënat shëndetësore.
Megjithatë, qeveria irlandeze ka nisur investime për krijimin e një sistemi kombëtar të dosjeve elektronike.
Një sfidë tjetër është literacia digjitale shëndetësore. Të dhënat nga 17 vende të OECD tregojnë se aftësia për të përdorur shërbimet shëndetësore online mbetet e ulët, veçanërisht te personat mbi 45 vjeç dhe te ata me nivel më të ulët arsimor.
Për shembull, në vitin 2024 vetëm 18% e personave me arsim më të ulët kishin literaci të mjaftueshme digjitale shëndetësore, krahasuar me 26% te personat me arsim të lartë.
Ekspertët theksojnë se zhvillimi i mirë i dosjeve elektronike dhe platformave të shkëmbimit të të dhënave është thelbësor për zgjerimin e shërbimeve digjitale si telekonsultimet dhe për përmirësimin e kujdesit shëndetësor në të gjithë Evropën. /Gazeta Shneta/