Një studim i ri ka zbuluar se loja Tetris mund të ndihmojë në zvogëlimin e kujtimeve të padëshiruara të traumës, të njohura si “flashback”, duke lehtësuar simptomat e çrregullimit të stresit post-traumatik (PTSD).
Sipas hulumtimit të publikuar në revistën shkencore “The Lancet Psychiatry”, mbajtja e trurit të angazhuar me një aktivitet vizual si Tetris mund të pengojë shfaqjen e kujtimeve të dhimbshme, pasi truri është i përqendruar në një detyrë tjetër.
Traumat psikologjike, si përjetimi i një ngjarjeje të dhunshme apo dëshmimi i një vdekjeje të papritur, mund të shkaktojnë kujtime të padëshiruara që shfaqen papritur dhe përsëriten për një kohë të gjatë, duke ndikuar negativisht në shëndetin mendor dhe fizik të individit. Këto kujtime zakonisht shfaqen si imazhe të forta vizuale të ngjarjes traumatike, shkruan burimi Euronews Health transmeton Gazeta Shneta.
Sipas autores kryesore të studimit, Emily Holmes nga Universiteti i Uppsala, edhe një kujtim i vetëm i papritur mund të ndikojë fuqishëm në jetën e përditshme, duke tërhequr vëmendjen e personit dhe duke shkaktuar emocione të pakontrolluara.
Studimi u përqendrua tek punonjësit e shëndetësisë që kishin përjetuar ngjarje traumatike gjatë pandemisë së COVID-19.
Trajtimi përfshin fillimisht rikujtimin e shkurtër të ngjarjes traumatike dhe më pas luajtjen e Tetris për rreth 20 minuta.
Loja angazhon zonat vizuale të trurit, duke konkurruar me kujtimet traumatike dhe duke ulur intensitetin, ndikimin emocional dhe shpeshtësinë e tyre.
Studiuesit vunë re gjithashtu përmirësime në ankth, depresion dhe funksionimin e përgjithshëm të pjesëmarrësve, duke sugjeruar se kjo metodë mund të jetë një qasje e thjeshtë dhe efektive për trajtimin e simptomave të traumës. /Gazeta Shneta/