Një studim i ri sugjeron se një test i thjeshtë gjaku mund të parashikojë rrezikun për demencë, përfshirë sëmundjen e Alzheimerit, deri në 25 vite para shfaqjes së simptomave, veçanërisht te gratë e moshuara. Ky test mat nivelin e një proteine të quajtur p-tau217, e cila lidhet me ndryshimet patologjike në tru.
Sëmundja e Alzheimerit karakterizohet nga grumbullimi jonormal i proteinave si beta-amiloidi dhe tau, që formojnë pllaka dhe ngatërresa në tru. Deri vonë, këto ndryshime zbuloheshin përmes skanimeve të shtrenjta të trurit ose analizave invazive të lëngut cerebrospinal, shkruan burimi Medical News Today transmeton Gazeta Shneta.
Megjithatë, biomarkerët në gjak po paraqiten si një alternativë më e thjeshtë, më e lirë dhe më pak invazive.
Studimi zbuloi se nivelet e larta të p-tau217 në gjak lidhen me një rrezik më të madh për zhvillimin e dëmtimit të lehtë njohës ose demencës në të ardhmen.
Kjo lidhje mund të vërehet shumë vite përpara se të shfaqen simptomat, duke ofruar mundësi për ndërhyrje të hershme.
Megjithatë, saktësia e këtij testi nuk është absolute dhe ndikohet nga faktorë si mosha, përkatësia racore dhe predispozita gjenetike.
Pavarësisht kësaj, identifikimi i hershëm i rrezikut mund t’u japë individëve kohë për të ndryshuar stilin e jetesës, si përmirësimi i gjumit, ulja e stresit dhe rritja e aktivitetit fizik dhe mendor.
Ky zbulim përfaqëson një hap të rëndësishëm drejt diagnostikimit më të hershëm dhe parandalimit të mundshëm të demencës. /Gazeta Shneta/