Përdorimi i barnave për humbje peshe mund të lidhet me një rrezik më të ulët për çrregullime të shëndetit mendor, përfshirë depresionin, ankthin dhe vetëdëmtimin, sipas një studimi të ri shkencor.
Hulumtimi i publikuar në The Lancet Psychiatry tregon se medikamentet e grupit GLP-1, veçanërisht ato që përmbajnë Semaglutide, lidhen me përmirësim të gjendjes mendore tek pacientët me diabet dhe obezitet.
Sipas studimit, personat që përdornin semaglutide kishin 42 për qind më pak rrezik për përkeqësim të sëmundjeve mendore, ndërsa për ata që përdornin Liraglutide rreziku ishte 18 për qind më i ulët.
Rreziku për depresion rezultoi 44 për qind më i ulët, ndërsa për çrregullimet e ankthit 38 për qind më i ulët. Po ashtu, përdorimi i semaglutide u shoqërua me 47 për qind më pak raste të lidhura me abuzimin e substancave dhe një rrezik më të ulët për vetëdëmtim, shkruan Euronews Health transmeton Gazeta Shneta.
Studimi përfshiu mbi 95 mijë persona me moshë mesatare rreth 50 vjeç, të cilët kishin diagnozë për depresion ose ankth dhe ishin duke përdorur barna kundër diabetit në periudhën 2009–2022.
Barnat GLP-1 funksionojnë duke imituar hormonin natyral që ndihmon në rregullimin e oreksit dhe nivelit të sheqerit në gjak. Megjithatë, studiuesit theksojnë se nuk mund të konfirmohet një lidhje e drejtpërdrejtë shkak-pasojë mes humbjes së peshës dhe përmirësimit të shëndetit mendor, pasi faktorët janë kompleksë.
Sipas të dhënave të Organizata Botërore e Shëndetësisë, rreth një në gjashtë persona në Evropë jeton me një çrregullim të shëndetit mendor, ndërsa këto probleme janë edhe më të shpeshta tek personat me diabet dhe obezitet./Gazeta Shneta/