Autoritetet shëndetësore në Evropë po paralajmërojnë për rrezikun në rritje nga bakteret Vibrio, të cilat jetojnë natyrshëm në ujërat bregdetare me përzierje të ujit të ëmbël dhe të kripur, sidomos kur temperaturat janë të larta dhe niveli i kripësisë është i ulët. Këto kushte po bëhen gjithnjë e më të zakonshme për shkak të ndryshimeve klimatike.
Qendra Evropiane për Parandalimin dhe Kontrollin e Sëmundjeve (ECDC) njoftoi se këto baktere, që zakonisht gjenden në Detin Baltik, tashmë janë të pranishme edhe në Detin e Veriut dhe në plazhe të mbyllura në disa vende të Evropës, shkruan burimi Euronews Health transmeton Gazeta Shneta.
Infeksionet nga këto baktere, të quajtura vibriozë (vibriosis), mund të shkaktojnë probleme serioze shëndetësore. Ato transmetohen përmes konsumimit të guaskave të papërpunuara ose përmes kontaktit të plagëve të hapura me ujin e ndotur.
Personat me sistem imunitar të dobësuar ose me sëmundje kronike të mëlçisë janë më të rrezikuar nga komplikimet, përfshirë infeksione në gjak, sëmundje të indeve të buta dhe amputime të gjymtyrëve.
Edhe pse infeksionet janë ende të rralla, në vitet e fundit disa vende përreth Detit Baltik kanë raportuar rritje të rasteve, sidomos gjatë valëve të gjata të të nxehtit. Në verën e vitit 2018 u raportuan 445 raste, më shumë se trefishi i mesatares vjetore për periudhën 2014–2017. /Gazeta Shneta/