Komisioni Evropian ka propozuar masa të reja për të ulur përdorimin e produkteve të duhanit, përmes një pakete taksash që synon rritjen e çmimeve në të gjithë BE-në. Dy propozimet kryesore përfshijnë rishikimin e Direktivës për Taksimin e Duhanit dhe krijimin e një burimi të ri të ardhurash për buxhetin e BE-së, të quajtur TEDOR.
Rishikimi synon të rrisë normat minimale të akcizës për produktet tradicionale të duhanit dhe të përfshijë gjithashtu produkte të reja, si lëngjet e cigareve elektronike, produktet e nikotinës për përtypje apo përdorim nazal, si dhe duhanin e papërpunuar, raporton Euronews Health transmeton Gazeta Shneta.
Përmes TEDOR-it, një normë e përbashkët prej 15% do të aplikohet mbi produktet e duhanit të prodhuara ose të importuara, bazuar në normën minimale të secilit shtet. Komisioni pret që ky mekanizëm të gjenerojë rreth 11.2 miliardë euro në vit.
Ndërkohë, nuk është e qartë nëse këto të ardhura do të përdoren për shlyerjen e borxheve të planit “NextGenerationEU”, apo për lehtësimin e kontributeve kombëtare në buxhetin e BE-së.
Këto përbëjnë ndryshimet më të mëdha ligjore të BE-së për duhanin që nga viti 2010 dhe synojnë të frenojnë tregtinë e paligjshme dhe blerjet ndërkufitare.
Megjithatë, miratimi i tyre kërkon dakordësi unanime nga të gjitha shtetet anëtare, një sfidë politike që mund ta vonojë zbatimin. /Gazeta Shneta/