Sëmundja inflamatore e zorrëve (IBD) është një gjendje kronike në të cilën sistemi imunitar sulmon gabimisht qelizat e shëndetshme të zorrëve, duke shkaktuar lodhje të vazhdueshme, dhimbje barku, diarre kronike dhe humbje peshe. IBD përfshin kolitin ulçeroz dhe sëmundjen e Krohn-it, me periudha përkeqësimi të simptomave.
Një studim i publikuar në “Cell Reports Medicine”, sugjeron se suplementimi me vitaminë D për 12 javë mund të përmirësojë reagimin imunitar dhe të ndihmojë trupin të shmangë sulmin ndaj vetvetes, shkruan burimi Medical News Today transmeton Gazeta Shneta.
Studimi përfshiu 48 të rritur me nivele të ulëta të vitaminës D, të cilët morën doza javore dhe u monitoruan përmes analizave të gjakut dhe feçeve.
Rezultatet treguan përmirësim të aktivitetit të sëmundjes dhe ulje të inflamacionit, të matur përmes proteinës C-reaktive. Gjithashtu, u vunë re ndryshime në imunoglobulina: rritje e IgA (e lidhur me stabilitet imunitar) dhe ulje e IgG (e lidhur me inflamacionin).
Këto ndryshime sugjerojnë një “rivendosje” të komunikimit mes sistemit imunitar dhe mikrobiomës së zorrëve, duke nxitur tolerancën imunitare.
Ekspertët theksojnë se vitamina D mund të ndikojë në përbërjen mikrobiale të zorrëve dhe në mënyrën si sistemi imunitar reagon ndaj saj.
Sipas tyre, kjo mbështet idenë se IBD nuk është vetëm inflamacion i tepërt, por edhe dështim i tolerancës ndaj baktereve të zorrëve.
Në përfundim, edhe pse kërkohen studime më të mëdha, këto gjetje sugjerojnë se vitamina D mund të jetë një strategji premtuese shtesë në menaxhimin e IBD. /Gazeta Shneta/