Një studim i ri shkencor sugjeron se vetëm shtatë ditë praktikë intensive e meditimit dhe teknikave mendje-trup mund të shkaktojnë ndryshime të matshme në tru dhe në organizëm, duke ndikuar jo vetëm në mirëqenien mendore, por edhe në shëndetin fizik.
Hulumtimi, i realizuar nga University of California San Diego dhe i publikuar në revistën Communications Biology, tregon se praktikat e përsëritura të meditimit mund të aktivizojnë mekanizma biologjikë që lidhen me fleksibilitetin e trurit, sistemin imunitar, metabolizmin dhe lehtësimin natyral të dhimbjes.
Sipas studiuesve, këto efekte shkojnë përtej relaksimit të zakonshëm.
“Ky nuk është vetëm reduktim i stresit, por një ndryshim themelor në mënyrën se si truri ndërvepron me realitetin,” tha një nga autorët e studimit.
Në studim morën pjesë 20 të rritur të shëndetshëm, të cilët ndoqën një retreat shtatëditor të udhëhequr nga autori dhe edukatori i neuroshkencës Joe Dispenza.
Gjatë kësaj periudhe, pjesëmarrësit zhvilluan rreth 33 orë meditim të udhëhequr, të kombinuar me ligjërata dhe aktivitete në grup.
Për të analizuar efektet, shkencëtarët përdorën skanime të trurit (fMRI) dhe analiza të gjakut para dhe pas retreat-it, duke matur ndryshimet në aktivitetin e trurit, metabolizëm dhe funksionin imunitar.
Rezultatet treguan disa ndryshime të rëndësishme:
U ul aktiviteti në zonat e trurit që lidhen me “zhurmën mendore” të vazhdueshme, duke sugjeruar një funksionim më efikas të trurit.
U rrit neuroplasticiteti, pra aftësia e trurit për të krijuar lidhje të reja nervore.
U vërejt përmirësim i fleksibilitetit metabolik të qelizave.
U rritën nivelet e opioideve natyrale të trupit, që ndihmojnë në reduktimin e dhimbjes.
Sistemi imunitar tregoi një përgjigje më të balancuar dhe adaptive.
Po ashtu, pjesëmarrësit raportuan përvoja më të thella emocionale dhe ndjenja të unitetit dhe vetëdijes së zgjeruar pas meditimit.
Një nga gjetjet më interesante ishte se modelet e lidhjeve në tru pas meditimit i ngjanin atyre që janë vërejtur më parë te personat që përdorin substanca psikedelike.
Ky sugjeron se meditimi mund të arrijë gjendje të thella të vetëdijes pa përdorimin e substancave.
Shkencëtarët theksojnë se mënyra se si mendojmë, përqendrohemi dhe praktikojmë teknika si meditimi mund të ketë ndikim të drejtpërdrejtë në shëndetin tonë, duke hapur rrugë të reja për promovimin e mirëqenies./Gazeta Shneta/