Një studim i ri sugjeron se statusi martesor mund të lidhet me rrezikun për zhvillimin e kancerit, duke treguar se personat e pamartuar kanë gjasa dukshëm më të larta për t’u prekur nga kjo sëmundje.
Hulumtimi, i publikuar në revistën Cancer Research Communications, ka analizuar të dhënat e mbi 100 milionë personave dhe më shumë se 4 milionë rasteve të kancerit në SHBA.
Sipas rezultateve, meshkujt që nuk janë martuar asnjëherë kanë rreth 68% rrezik më të lartë për kancer, ndërsa tek femrat ky rrezik arrin deri në 85%, shkruan HealthDay transmeton Gazeta Shneta.
Studimi tregon se rreziku është veçanërisht i lartë për kanceret që mund të parandalohen përmes kontrolleve të rregullta dhe trajtimit të hershëm.
Studiuesit theksojnë se martesa nuk e parandalon drejtpërdrejt kancerin, por mund të lidhet me faktorë të tjerë që ndikojnë në shëndet.
Personat e martuar shpesh kanë mbështetje më të madhe sociale dhe janë më të prirur të ndjekin kontrollet mjekësore, të zbulojnë sëmundjen në faza më të hershme dhe të ndjekin trajtimin në mënyrë më të rregullt.
Ekspertët rekomandojnë që personat e pamartuar të jenë më të kujdesshëm ndaj faktorëve të rrezikut, si duhani, alkooli dhe kontrollet shëndetësore periodike.
Ata theksojnë se gjetjet nuk duhet të interpretohen si arsye për të nxitur martesën, por si një tregues për rëndësinë e faktorëve socialë në shëndet.
Studimi nënvizon nevojën për më shumë ndërgjegjësim dhe strategji parandaluese, veçanërisht për grupet që mund të jenë më të rrezikuara.