Një studim i ri sugjeron se infeksioni me virusin Epstein-Barr, i cili shkakton mononukleozën infektive, mund të rrisë ndjeshëm rrezikun për zhvillimin e Skleroza Multiple.
Hulumtimi, i publikuar në Neurology Open Access, ka gjetur se personat që kanë kaluar mononukleozën kanë më shumë se trefish rrezik për t’u prekur nga kjo sëmundje neurologjike.
Studiuesit analizuan të dhënat shëndetësore për më shumë se 20 vite, duke identifikuar 4,721 persona që kishin rezultuar pozitivë për virusin Epstein-Barr dhe mononukleozë.
Ata i krahasuan këta pacientë me persona të tjerë të së njëjtës moshë dhe gjini që nuk kishin kaluar këtë infeksion.
Gjatë një periudhe mesatare ndjekjeje prej tetë vitesh, u vu re se personat që kishin pasur mononukleozë kishin një rrezik dukshëm më të lartë për të zhvilluar sklerozë multiple.
Megjithatë, studiuesit theksojnë se rezultatet tregojnë një lidhje dhe jo një shkak të drejtpërdrejtë mes infeksionit dhe sëmundjes.
Sipas tyre, ende nuk është e qartë pse ky virus mund të ndikojë në rritjen e rrezikut për sklerozë multiple.
Ekspertët theksojnë rëndësinë e hulumtimeve të mëtejshme për të kuptuar mekanizmat që qëndrojnë pas kësaj lidhjeje dhe për të zhvilluar strategji parandaluese.
Ata shtojnë se parandalimi i infeksioneve me virusin Epstein-Barr mund të ndihmojë në uljen e rasteve të sklerozës multiple në të ardhmen, edhe pse kjo sëmundje mbetet relativisht e rrallë.