Një studim i ri nga studiues të Yale School of Medicine tregon se koha kur prindërit përjetojnë depresion mund të ketë ndikim afatgjatë në shëndetin mendor të fëmijëve të tyre.
Hulumtimi, i publikuar në JAMA Network Open, ka analizuar të dhënat e mbi 5 mijë personave gjatë një periudhe 30-vjeçare, duke vlerësuar ndikimin e depresionit të prindërve nga periudha e shtatzënisë deri në moshën 21-vjeçare.
Sipas studiuesve, shtatzënia rezulton të jetë një periudhë veçanërisht e ndjeshme. Ekspozimi ndaj niveleve të larta të depresionit tek nëna gjatë kësaj kohe lidhet me rrezik të shtuar për çrregullime psikotike tek fëmijët në moshë të rritur.
Ndikimi i depresionit të nënës në simptomat depresive të fëmijëve është vërejtur edhe gjatë gjithë fëmijërisë.
Nga ana tjetër, efektet e depresionit tek baballarët janë vërejtur kryesisht duke filluar nga fëmijëria e mesme, duke treguar se periudhat kohore të ndikimit ndryshojnë mes prindërve.
Studiuesit theksojnë se këto dallime sugjerojnë mekanizma të ndryshëm përmes të cilëve shëndeti mendor i nënës dhe babait ndikon tek fëmijët.
Ekspertët nënvizojnë se mbështetja për shëndetin mendor të prindërve, veçanërisht gjatë shtatzënisë dhe gjatë rritjes së fëmijës, është thelbësore për mirëqenien afatgjatë të brezave të ardhshëm.
Sipas tyre, ndërhyrjet e hershme dhe monitorimi i vazhdueshëm i shëndetit mendor të prindërve mund të kenë ndikim pozitiv jo vetëm për ta, por edhe për fëmijët e tyre në të ardhmen.
Studimi sjell dëshmi të reja për lidhjen mes shëndetit mendor të prindërve dhe zhvillimit afatgjatë të fëmijëve, duke theksuar rëndësinë e kujdesit të vazhdueshëm në këtë aspekt./Gazeta Shneta/