Një studim i ri i prezantuar në një konferencë të neurologjisë në SHBA sugjeron se ndërhyrjet në stilin e jetesës mund të kenë efekt më të madh në përmirësimin e funksioneve njohëse tek pacientët me demencë të hershme dhe dëmtim të lehtë njohës.
Sipas hulumtimit të udhëhequr nga Dr. Majid Fotuhi, ndërhyrjet multimodale në stilin e jetesës (MMLIs) kanë treguar përmirësim të matshëm të funksioneve njohëse, krahasuar me disa terapi medikamentoze që përdoren aktualisht.
Studimi u prezantua në American Academy of Neurology Annual Meeting 2025 dhe përfshiu analizën e disa studimeve të kontrolluara klinike deri në korrik 2025.
Studiuesit raportojnë se pacientët që ndoqën programe të ndërhyrjeve në stilin e jetesës treguan përmirësim në testet e funksionit njohës, me rezultate që varionin nga 1.3 deri në 2.6 pikë në shkallën ADAS-Cog.
Përveç përmirësimeve në kujtesë dhe funksionet njohëse, u raportuan edhe përfitime në ekuilibër, shpejtësinë e ecjes, gjendjen emocionale dhe cilësinë e jetës.
Nga ana tjetër, terapitë me antitrupa monoklonalë (MABs), të cilat përdoren për trajtimin e Alzheimerit, kanë treguar vetëm ngadalësim të moderuar të përkeqësimit të funksioneve njohëse.
Sipas të dhënave të studimit, këto terapi kanë arritur të ruajnë 1.3 deri në 1.5 pikë në testet njohëse krahasuar me placebo, edhe pse kanë efekt të qartë në largimin e pllakave amiloide në tru.
Studiuesit theksojnë se, ndonëse trajtimet medikamentoze përfaqësojnë një përparim shkencor, rezultatet sugjerojnë se përmirësimi i shëndetit të trurit kërkon një qasje më të gjerë, që përfshin stilin e jetesës.
“Ndërhyrjet në stilin e jetesës duket se kanë efekt më të madh sesa disa terapi që synojnë vetëm amiloidin”, ka deklaruar Dr. Majid Fotuhi.
Studimi vë në pah rëndësinë e kombinimit të qasjeve mjekësore dhe atyre të përditshmërisë në trajtimin e sëmundjeve neurodegjenerative si Alzheimeri.