Pacientët me diabet të tipit 2 që përdorin pajisje për monitorimin e vazhdueshëm të glukozës në gjak (CGM) arrijnë kontroll më të mirë të sheqerit në krahasim me ata që mbështeten në testet tradicionale me shpim gishti, tregon një studim i ri.
Sipas hulumtimit të publikuar më 23 prill në revistën shkencore The Lancet Diabetes & Endocrinology, përdorimi i CGM çon në ulje më të theksuar të niveleve të hemoglobinës A1c (HbA1c), një tregues kyç për kontrollin afatgjatë të glukozës në gjak.
“Diabeti është jashtëzakonisht sfidues për t’u menaxhuar,” ka deklaruar Emma Wilmot, profesoreshë klinike në University of Nottingham. Sipas saj, shumë pacientë që morën pjesë në studim e përshkruan përdorimin e kësaj teknologjie si “ndryshues të jetës”.
Monitorimi i vazhdueshëm i glukozës realizohet përmes një sensori të vendosur në pjesën e pasme të krahut, i cili mat në mënyrë të pandërprerë nivelet e sheqerit në gjak dhe i transmeton të dhënat në kohë reale në një pajisje ose telefon inteligjent. Kjo u mundëson pacientëve të reagojnë menjëherë ndaj luhatjeve të rrezikshme.
Studimi përfshiu më shumë se 300 pacientë me diabet tip 2, të cilët u ndanë në dy grupe: njëri përdori CGM, ndërsa tjetri vazhdoi me metodat tradicionale. Pas 16 dhe 32 javësh, rezultatet treguan se grupi me CGM kishte nivele më të ulëta të HbA1c.
“Pjesëmarrësit arritën përmirësime të ndjeshme edhe pa ndryshuar terapinë në fazën e parë, çka tregon se informacioni nga sensorët ndihmon në marrjen e vendimeve më të mira ditore,” ka thënë Lala Leelarathna nga Imperial College London.
Ekspertët vlerësojnë se kjo teknologji mund të lehtësojë ndjeshëm menaxhimin e diabetit, duke reduktuar nevojën për testime të shpeshta dhe duke ndihmuar në parandalimin e komplikimeve serioze si sëmundjet e zemrës, verbëria apo amputimet.
Megjithatë, studiuesit theksojnë se nevojiten analiza të mëtejshme për të vlerësuar kostot dhe mundësinë e përdorimit më të gjerë të kësaj metode tek pacientët me diabet të tipit 2.