Jo të gjithë vajrat e ullirit janë njësoj kur bëhet fjalë për shëndetin. Një studim i ri sugjeron se vaji i ullirit ekstra i virgjër (EVOO) mund të ketë përfitime të rëndësishme jo vetëm për zemrën, por edhe për trurin dhe shëndetin e zorrëve, ndryshe nga vaji i rafinuar.
Hulumtimi, i udhëhequr nga Jiaqi Ni në University of Rovira i Virgili, ka ndjekur për dy vite 656 të rritur me mbipeshë ose obezitet, të moshës 55 deri në 75 vjeç, të cilët kishin faktorë rreziku për sëmundje kardiovaskulare.
Rezultatet treguan se pjesëmarrësit që konsumonin rregullisht vaj ulliri ekstra të virgjër kishin përmirësim të funksioneve njohëse dhe një diversitet më të madh të baktereve të dobishme në zorrë – një tregues i shëndetit më të mirë metabolik.
Sipas studiuesve, këto përfitime lidhen me një grup specifik bakteresh të zorrëve, të njohura si Adlercreutzia, të cilat duket se luajnë rol në lidhjen mes ushqyerjes dhe funksionit të trurit.
“Jo të gjithë vajrat e ullirit kanë përfitime për funksionin kognitiv,” ka theksuar Ni, duke shtuar se mënyra e prodhimit është kyçe për cilësinë e tyre.
Vaji ekstra i virgjër prodhohet me metoda mekanike që ruajnë përbërësit e dobishëm si antioksidantët, polifenolët dhe vitaminat. Në anën tjetër, vaji i rafinuar përpunohet për të zgjatur afatin e përdorimit dhe për të standardizuar shijen, proces që redukton ndjeshëm këto përbërës të rëndësishëm.
Edhe Jordi Salas-Salvadó, profesor i nutricionit në University of Rovira i Virgili, thekson rëndësinë e cilësisë së yndyrnave në dietë.
“Ky studim përforcon idenë se cilësia e yndyrës që konsumojmë është po aq e rëndësishme sa sasia,” ka deklaruar ai, duke shtuar se vaji ekstra i virgjër mund të ndihmojë në ruajtjen e funksioneve të trurit gjatë plakjes.
Gjetjet hapin rrugë për strategji të reja ushqimore që synojnë mbrojtjen e shëndetit kognitiv përmes dietës./Gazeta Shneta/