Obeziteti është rritur ndjeshëm në mbarë botën që nga viti 1990, duke prekur sot mbi 16% të të rriturve. Kjo gjendje lidhet me shumë probleme shëndetësore, përfshirë sëmundjet kardiovaskulare, diabetin e tipit 2, vështirësitë në frymëmarrje dhe lëvizshmërinë e kufizuar. Një studim i ri sugjeron se humbja e peshës mund të përmbysë disa nga dëmtimet që obeziteti shkakton në zemër.
Dështimi i zemrës, një gjendje ku zemra nuk pompon gjakun në mënyrë efikase, është më i zakonshëm tek personat me obezitet. Veçanërisht, një formë e quajtur HFpEF (dështim i zemrës me fraksion të ruajtur nxjerrjeje) është më e përhapur tek kjo kategori.
Në këtë rast, zemra pompon normalisht, por nuk mbushet siç duhet për shkak të ngurtësimit të muskulit të saj, shkruan burimi Medical News Today.
Studimi tregoi se tek personat me obezitet të rëndë dhe HFpEF, humbja e peshës përmes trajtimit me agonistë GLP-1 përmirëson aftësinë e qelizave të muskulit të zemrës për t’u tkurrur. Kjo do të thotë se funksioni i zemrës mund të rikuperohet pjesërisht, transmeton Gazeta Shneta.
Analizat e qelizave të zemrës zbuluan ndryshime kimike të rëndësishme, sidomos në një proteinë të quajtur troponinë-I, e cila është thelbësore për tkurrjen dhe relaksimin e muskujve.
Tek personat me obezitet të rëndë, këto ndryshime dobësojnë forcën e zemrës.
Megjithëse disa barna janë testuar për të korrigjuar këto ndryshime, ende nuk ka trajtime të miratuara plotësisht.
Studiuesit theksojnë nevojën për kërkime të mëtejshme për të zhvilluar terapi efektive. /Gazeta Shneta/