Përdorimi i barnave GLP-1 për humbje peshe është rritur ndjeshëm vitet e fundit. Këto medikamente përdoren gjerësisht si për dobësim ashtu edhe për trajtimin e sëmundjeve kronike. Megjithatë, një shqetësim i zakonshëm ka qenë se humbja e peshës nga këto barna përfshin jo vetëm dhjamin, por edhe masën muskulore.
Një studim i ri tregon se kjo frikë mund të jetë e ekzagjeruar. Sipas analizës së 36 studimeve të mëparshme, pjesa më e madhe e peshës së humbur nga përdorimi i GLP-1 vjen nga reduktimi i dhjamit, ndërsa humbja e muskujve është relativisht e vogël, shkruan burimi Medical News Today transmeton Gazeta Shneta.
Pas 3 muajsh përdorimi, pjesëmarrësit humbën rreth 9% të peshës fillestare, me ulje të dukshme të yndyrës abdominale, indeksit të masës trupore (BMI) dhe perimetrit të belit. Në këtë fazë, humbja e masës muskulore ishte minimale.
Pas 12 muajsh, rezultatet treguan reduktime edhe më të mëdha në yndyrën trupore dhe atë viscerale. Edhe pse u vu re njëfarë humbjeje e masës së dobët trupore (që përfshin muskujt), ajo ishte dukshëm më e vogël krahasuar me humbjen totale të peshës.
Ekspertët theksojnë se, në praktikë, pacientët zakonisht humbasin kryesisht dhjam. Gjithashtu, studime të tjera sugjerojnë se humbja e muskujve mund të minimizohet përmes ushtrimeve të forcës dhe konsumit të mjaftueshëm të proteinave.
Këto gjetje e bëjnë më të qartë se trajtimi me GLP-1 është një mjet efektiv për humbje peshe, pa ndikuar ndjeshëm në masën muskulore. /Gazeta Shneta/