Dendësia e gjirit po konsiderohet gjithnjë e më shumë si një nga faktorët kryesorë të rrezikut për zhvillimin e kancerit të gjirit, megjithëse shumë gra ende nuk janë të informuara për të.
Ekspertët paralajmërojnë se gjinjtë e dendur jo vetëm rrisin mundësinë e zhvillimit të sëmundjes, por edhe e bëjnë më të vështirë zbulimin e saj në fazat e hershme, shkruan burimi Independent UK transmeton Gazeta Shneta.
Dendësia e gjirit përcaktohet nga sasia e indeve gjëndrore dhe fibroze krahasuar me yndyrën në gji. Në mamografi, indi i dendur dhe tumoret shfaqen të bardha, duke e bërë të vështirë dallimin e anomalive. Për këtë arsye, disa raste të kancerit mund të mos zbulohen gjatë kontrolleve rutinë.
Studimet tregojnë se gratë me gjinj shumë të dendur kanë pothuajse dy herë më shumë rrezik për të zhvilluar kancer gjiri krahasuar me ato me dendësi të ulët.
Rreziku pas moshës 50-vjeçare mund të arrijë deri në 15 për qind tek gratë me dendësi të lartë, ndërsa tek ato me dendësi më të ulët mbetet rreth 6 për qind.
Mamografia mbetet metoda kryesore e kontrollit, por efikasiteti i saj bie ndjeshëm tek gratë me gjinj të dendur.
Për këtë arsye, specialistët rekomandojnë edhe kontrolle shtesë si rezonanca magnetike, e cila mund të zbulojë tumore që mamografia nuk i evidenton.
Rreth 40 për qind e grave kanë dendësi të lartë të gjirit, sidomos gratë më të reja, ato që përdorin terapi hormonale dhe persona me predispozitë gjenetike.
Mjekët rekomandojnë që gratë të informohen për dendësinë e gjirit pas mamografisë dhe të konsultohen me specialistët për mënyrat më të përshtatshme të kontrollit dhe diagnostikimit të hershëm. /Gazeta Shneta/