Sipas të dhënave të vitit 2022, rreth 2.3 milionë gra në mbarë botën u diagnostikuan me kancer të gjirit, ndërsa afro 670 mijë humbën jetën nga kjo sëmundje.
Kanceri i gjirit vazhdon të mbetet një nga format më të zakonshme të kancerit tek gratë dhe ende nuk ekziston një kurë përfundimtare, shkruan burimi Medical News Today transmeton Gazeta Shneta.
Trajtimet zakonisht përfshijnë kimioterapi, terapi hormonale, rrezatim, medikamente specifike dhe ndërhyrje kirurgjikale.
Një zhvillim i rëndësishëm në këtë fushë është miratimi nga FDA i testit të parë me inteligjencë artificiale, i quajtur ArteraAI Breast.
Ky sistem përdor imazhet digjitale të indeve të marra gjatë operacionit dhe të dhëna klinike për të parashikuar rrezikun e përhapjes së kancerit tek pacientet me fazë të hershme të kancerit HR+/HER2-.
Teknologjia është trajnuar me të dhëna nga mbi 8,500 paciente dhe ndihmon mjekët të kategorizojnë rastet në rrezik të ulët ose të lartë.
Qëllimi kryesor është përcaktimi më i saktë i trajtimit. Pacientet me rrezik më të ulët mund të shmangin trajtime të panevojshme intensive, ndërsa ato me rrezik më të lartë mund të marrin terapi më agresive në kohë.
Ekspertët theksojnë se kjo metodë mund të ulë kostot dhe vonesat krahasuar me testet tradicionale, duke ofruar rezultate më të shpejta dhe më të qasshme për pacientet dhe mjekët. /Gazeta Shneta/