Barnat e grupit GLP-1, të përdorura gjerësisht për trajtimin e diabetit të tipit 2 dhe obezitetit, po studiohen gjithnjë e më shumë për përfitime të mundshme përtej kontrollit të sheqerit në gjak dhe peshës trupore.
Sipas raporteve shkencore, këto medikamente mund të kenë rol edhe në ngadalësimin e përparimit të disa llojeve të kancerit, shkruan New York Post, transmeton Gazeta Shneta.
Studiuesit po analizojnë mekanizmat biologjikë përmes të cilëve GLP-1 mund të ndikojë në rritjen e tumoreve. Një nga hipotezat kryesore është se humbja e peshës dhe përmirësimi i metabolizmit që vjen nga këto barna mund të reduktojë faktorët që favorizojnë zhvillimin e qelizave kancerogjene, si inflamacioni kronik dhe rezistenca ndaj insulinës.
Ekspertët theksojnë se obeziteti është një faktor i njohur rreziku për disa lloje kanceri, prandaj çdo terapi që ndihmon në kontrollin e peshës dhe metabolizmit mund të ketë ndikim indirekt mbrojtës. Megjithatë, ata paralajmërojnë se rezultatet aktuale janë ende paraprake dhe nuk mjaftojnë për të përdorur këto barna si trajtim kundër kancerit.
Hulumtimet e deritanishme konsiderohen premtuese dhe po nxisin studime më të thelluara klinike për të kuptuar nëse GLP-1 mund të bëhet pjesë e strategjive të ardhshme terapeutike në onkologji. /Gazeta Shneta/