Një analizë e thjeshtë gjaku mund të ndihmojë në identifikimin e shenjave të hershme të rënies njohëse shumë vite përpara se të shfaqen simptomat e demencës, sipas një studimi të ri të publikuar në revistën “The Lancet”.
Studiuesit analizuan të dhënat e rreth 1.300 personave me moshë mesatare 61 vjeç, pjesë e një studimi afatgjatë në Shtetet e Bashkuara.
Ata zbuluan se 6% e pjesëmarrësve kishin nivele të larta të proteinave beta-amiloide dhe tau në gjak, biomarkues që lidhen ngushtë me sëmundjen e Alzheimerit, shkruan burimi Medical News Today transmeton Gazeta Shneta.
Personat me këto biomarkues rezultuan të kishin performancë më të dobët në testet e përpunimit të informacionit dhe funksioneve ekzekutive të trurit. Pesë vjet më vonë, ata shfaqën një rrezik 2.5 deri në 4 herë më të lartë për përkeqësim të shpejtë të kujtesës verbale dhe një rrezik 3 deri në 4 herë më të madh për rënie të shpejtë të përpunimit mendor.
Sipas autorëve të studimit, këto analiza mund të shërbejnë si një mjet i vlefshëm për identifikimin e personave me rrezik të shtuar dhe për nxitjen e ndryshimeve të hershme në stilin e jetesës, të cilat mund të ulin gjasat e zhvillimit të demencës.
Ekspertët theksojnë se prania e biomarkuesve nuk do të thotë domosdoshmërisht se një person do të zhvillojë Alzheimer.
Megjithatë, zbulimi i hershëm mbetet thelbësor, pasi dëmtimet e trurit shpesh janë të avancuara dhe të pakthyeshme kur simptomat e kujtesës bëhen të dukshme.
Për këtë arsye, parandalimi dhe ndërhyrja e hershme konsiderohen më efektive sesa trajtimi i dëmeve të shkaktuara nga sëmundja. /Gazeta Shneta/