Spitali i Përgjithshëm në Pejë ka nisur për herë të parë ofrimin e skriningut neonatal për të gjitha foshnjat e porsalindura, një shërbim që mundëson zbulimin e hershëm të disa sëmundjeve të rralla dhe potencialisht të rënda që në ditët e para të jetës.
Sipas njoftimit të spitalit, përmes këtij programi do të bëhet kontrolli i të porsalindurve për pesë sëmundje: hipotiroidizmin kongjenital, fenilketonurinë, fibrozën cistike, galaktozeminë dhe atrofinë muskulore spinale (SMA).
Këto sëmundje mund të mos shfaqin simptoma menjëherë pas lindjes, por zbulimi i hershëm u jep mundësi mjekëve të fillojnë trajtimin në kohë, duke parandaluar komplikime serioze dhe duke përmirësuar zhvillimin dhe cilësinë e jetës së fëmijëve.
Nga Spitali i Përgjithshëm në Pejë vlerësohet se ky shërbim përfaqëson një hap të rëndësishëm në avancimin e kujdesit shëndetësor për të porsalindurit, duke ofruar standarde më të larta të diagnostikimit dhe trajtimit që nga ditët e para të jetës./Gazeta Shneta/
