Pacientët në disa vende evropiane po përballen me pritje të gjata për të marrë shërbime shëndetësore, ndërsa në raste të caktuara pritja për ndërhyrje kirurgjikale arrin deri në dy vjet, sipas raportit më të fundit “Health at a Glance 2025” të Organizatës për Bashkëpunim dhe Zhvillim Ekonomik (OECD).
Raporti vlerëson se vonesat në trajtim po shndërrohen në një nga sfidat më të mëdha të sistemeve shëndetësore evropiane, duke ndikuar drejtpërdrejt në cilësinë e jetës së pacientëve dhe rezultatet e trajtimit, shkruan Euronews Health, transmeton Gazeta Shneta.
Sipas të dhënave, në Mbretërinë e Bashkuar 11 për qind e pacientëve presin më shumë se një vit për një takim me mjek specialist. Në Francë dhe Gjermani kjo përqindje është rreth 2 për qind.
Edhe qasja te mjeku i familjes nuk është gjithmonë e shpejtë. Në Suedi, 23 për qind e pacientëve presin më shumë se një javë për një konsultë me mjekun ose infermierin, ndërsa në Francë dhe Gjermani kjo shifër arrin në 20 për qind.
Raporti evidenton edhe pritje të gjata për operacionet e kataraktës. Në Norvegji, 81 për qind e pacientëve kanë pritur më shumë se tre muaj për trajtim gjatë vitit 2024. Në Finlandë kjo përqindje ishte 71 për qind, ndërsa në Mbretërinë e Bashkuar dhe Portugali 58 për qind.
Një nga rastet më ekstreme është Sllovenia, ku pacientët kanë pritur mesatarisht 667 ditë për zëvendësimin e ijës, afërsisht dy vjet. Pas saj renditen Polonia me 343 ditë, Hungaria me 209 ditë dhe Mbretëria e Bashkuar me 174 ditë pritje.
Ekspertët theksojnë se listat e gjata të pritjes krijohen si rezultat i mospërputhjes ndërmjet kërkesës në rritje për shërbime shëndetësore dhe kapaciteteve të sistemeve shëndetësore.
Sipas raportit, plakja e popullsisë, mungesa e personelit shëndetësor, financimi i kufizuar dhe pasojat e pandemisë COVID-19 janë ndër faktorët kryesorë që po ndikojnë në rritjen e kohës së pritjes për pacientët në Evropë.
OECD paralajmëron se vonesat në trajtim mund të zgjasin periudhën e dhimbjes dhe paaftësisë tek pacientët, si dhe të ndikojnë negativisht në rezultatet shëndetësore pas ndërhyrjeve mjekësore.