Një studim i ri sugjeron se një test i thjeshtë urine mund të ndihmojë në identifikimin e hershëm të fëmijëve me rrezik për çrregullimin e spektrit autik. Studiuesit zbuluan se fëmijët me autizëm kanë profile të veçanta të mikrobeve në zorrë, të cilat prodhojnë substanca kimike të dallueshme që mund të maten në urinë.
Në studim u analizuan mostrat e urinës së 52 fëmijëve me autizëm dhe 47 fëmijëve me zhvillim tipik. Rezultatet treguan se testi identifikoi saktë rreth 90% të fëmijëve me autizëm, pa klasifikuar gabimisht asnjë fëmijë pa këtë gjendje, shkruan burimi Health Day transmeton Gazeta Shneta.
Shkencëtarët identifikuan nivele të larta të disa metabolitëve – substanca të prodhuara nga mikrobet e zorrëve – të lidhura me serotoninën dhe dopaminën, dy neurotransmetues të rëndësishëm për humorin, kujtesën, vëmendjen dhe komunikimin social.
Sipas studiuesve, këto ndryshime biologjike mund të lidhen me disa nga simptomat që shfaqin fëmijët me autizëm.
Testi është projektuar për fëmijët e moshës 2 deri në 11 vjeç dhe mund të ndihmojë në identifikimin më të hershëm të rasteve, duke mundësuar ndërhyrje dhe mbështetje më të shpejtë për familjet.
Aktualisht, diagnostikimi i autizmit bazohet kryesisht në vëzhgimin e sjelljes, proces që shpesh kërkon kohë.
Megjithatë, ekspertët theksojnë se nevojiten studime të mëtejshme për të konfirmuar saktësinë dhe përdorshmërinë klinike të këtij testi. /Gazeta Shneta/