Një studim i ri paralajmëron se cigaret elektronike me kapacitet të lartë përdorimi, të njohura si “high-puff vapes”, mund të bëhen më toksike sa më gjatë që përdoren. Këto pajisje janë projektuar për mijëra thithje dhe përmbajnë sasi më të mëdha lëngu, duke zgjatur përdorimin e tyre për periudha më të gjata.
Studiuesit analizuan 77 cigare elektronike të përdorura nga marka të ndryshme dhe zbuluan se, me kalimin e kohës, në lëngun e mbetur grumbullohen substanca kimike të dëmshme të quajtura aldehide. Këto formohen kur lëngu ekspozohet vazhdimisht ndaj nxehtësisë që prodhon avullin, shkruan burimi Health Day.
Ndër substancat e identifikuara ishin formaldehidi, i njohur si kancerogjen, si dhe përbërës të tjerë që mund të dëmtojnë qelizat e mushkërive. Testet laboratorike treguan se disa prej këtyre kimikateve shkaktonin dëmtime të dukshme në qelizat njerëzore të mushkërive, transmeton Gazeta Shneta.
Sipas studiuesve, rreziku mund të rritet veçanërisht kur pajisja i afrohet fundit të lëngut, pasi përqendrimi i produkteve toksike bëhet më i lartë.
Ata theksojnë se numri i thithjeve nuk duhet parë vetëm si një element marketingu, por edhe si një faktor që mund të ndikojë drejtpërdrejt në ekspozimin ndaj substancave të dëmshme.
Ekspertët kërkojnë më shumë kontrolle dhe standarde sigurie për këto produkte, duke paralajmëruar se përdoruesit shpesh nuk kanë informacion të mjaftueshëm për përbërjen kimike të avullit që thithin gjatë fazave të fundit të përdorimit të një cigareje elektronike. /Gazeta Shneta/