Më shumë se një shekull pas zbulimit të insulinës, një nga ilaçet më të rëndësishme në historinë e mjekësisë, miliona persona me diabet vazhdojnë të mos kenë qasje në këtë terapi jetike, paralajmërojnë ekspertët e shëndetit publik.
Insulina, e zbuluar në vitin 1921, ndryshoi rrënjësisht trajtimin e diabetit të tipit 1, duke e kthyer një sëmundje dikur fatale në një gjendje kronike të menaxhueshme. Megjithatë, sipas analizave të fundit, qasja në këtë medikament mbetet një sfidë serioze në shumë vende të botës.
Ekspertët vlerësojnë se vetëm një në dy persona me diabet të tipit 2 në nivel global arrin të sigurojë insulinën që i nevojitet. Situata është edhe më e rëndë në Afrikë, ku vetëm një në shtatë pacientë ka qasje në trajtimin e domosdoshëm.
Mungesa e insulinës mund të çojë në komplikime të rënda shëndetësore, përfshirë sëmundjet e zemrës, goditjen në tru, insuficiencën renale dhe verbërinë. Për pacientët me diabet të tipit 1, mungesa e insulinës mund të jetë fatale.
Sipas të dhënave, rreth 9 milionë persona me diabet të tipit 1 varen plotësisht nga insulina për të mbijetuar, ndërsa ky medikament luan rol të rëndësishëm edhe në trajtimin e rreth 63 milionë pacientëve me diabet të tipit 2.
Një nga arsyet kryesore të problemit mbetet çmimi i lartë i insulinës dhe dominimi i tregut nga tre kompani të mëdha farmaceutike, të cilat kontrollojnë rreth 90 për qind të tregut global të këtij produkti.
Ekspertët theksojnë se qeveritë kanë rol kyç në garantimin e qasjes së pacientëve në insulinë përmes investimeve në kërkim shkencor, rregullimit të tregut farmaceutik, forcimit të sistemeve shëndetësore dhe sigurimit të zinxhirit të furnizimit.
Ata paralajmërojnë se, pa ndërhyrje të forta institucionale, pabarazitë në qasjen ndaj insulinës do të vazhdojnë të thellohen, pavarësisht përparimeve të mëdha shkencore të arritura gjatë dekadave të fundit.