Ministria e Shëndetësisë së Spanjës ka konfirmuar 111 raste të një forme të rrallë kanceri që lidhet me implantet e gjirit. Të dhënat janë publikuar nga Agjencia Spanjolle e Barnave dhe Pajisjeve Mjekësore (AEMPS), e cila monitoron këtë gjendje që nga viti 2012.
Sipas burimit Euronews Health, deri në vitin 2025, agjencia ka marrë gjithsej 146 raportime të dyshuara, nga të cilat 111 janë konfirmuar.
Rastet janë identifikuar përmes sistemit kombëtar të mbikëqyrjes së pajisjeve mjekësore. Rajoni i Madridit ka numrin më të lartë të raportimeve, i ndjekur nga Andaluzia, Katalonja dhe Komuniteti Valencian, transmeton Gazeta Shneta.
Sëmundja njihet si limfoma anaplastike e lidhur me implantet e gjirit (BIA-ALCL). Ajo nuk është kancer i indit të gjirit, por një lloj i rrallë limfome që zhvillohet në qelizat e sistemit imunitar, zakonisht në kapsulën fibroze që formohet rreth implantit.
Ekspertët theksojnë se kjo sëmundje mbetet shumë e rrallë krahasuar me numrin e madh të grave që kanë implante të gjirit.
Megjithatë, vazhdimi i monitorimit dhe zbulimi i hershëm konsiderohen të rëndësishëm për trajtimin e suksesshëm të rasteve.
Studimet e deritanishme sugjerojnë se zhvillimi i kësaj sëmundjeje mund të lidhet me disa faktorë, përfshirë llojin e implantit, predispozitën gjenetike dhe proceset inflamatore.
Megjithatë, shkencëtarët ende nuk kanë përcaktuar një shkak të vetëm dhe mekanizmi i saktë që çon në shfaqjen e kësaj limfome mbetet i paqartë. /Gazeta Shneta/