Shkencëtarët britanikë kanë zhvilluar një lloj të ri vaksine, komponenti kryesor i së cilës është projektuar tërësisht nga inteligjenca artificiale (AI). Sipas studiuesve të Universitetit të Kembrixhit, kjo është hera e parë që një vaksinë e krijuar në këtë mënyrë testohet te njerëzit.
Sipas BBC, qëllimi i vaksinës është të ofrojë mbrojtje jo vetëm kundër varianteve aktuale të COVID-19, por edhe kundër koronavirusëve të tjerë që qarkullojnë te kafshët dhe që mund të shkaktojnë pandemia në të ardhmen.
Studiuesit po zhvillojnë gjithashtu teknologji të ngjashme për gripin sezonal, gripin e shpendëve dhe virusin Ebola, transmeton Gazeta Shneta.
Ndryshe nga vaksinat tradicionale, të cilat bazohen në një variant specifik të virusit, inteligjenca artificiale analizoi informacionin gjenetik të shumë koronavirusëve dhe krijoi një “super-antigjen”.
Antigjeni është pjesa e vaksinës që mëson sistemin imunitar të njohë dhe të luftojë infeksionet. Ideja është që organizmi të fitojë mbrojtje më të gjerë, edhe nëse virusi ndryshon ose shfaqen variante të reja.
Deri tani, vaksina është testuar te 39 persona për të vlerësuar sigurinë e saj. Rezultatet e para tregojnë se përgjigjja imunitare ishte modeste, por mjaftueshëm premtuese për të vazhduar kërkimet.
Një studim më i madh me rreth 200 pjesëmarrës është tashmë në zhvillim.
Ekspertët e pavarur e konsiderojnë këtë një hap të rëndësishëm në shkencën e vaksinave. Ata besojnë se inteligjenca artificiale mund të përshpejtojë zhvillimin e vaksinave të reja dhe të ndihmojë në përgatitjen më të mirë të botës për shpërthime të ardhshme epidemike apo pandemike. /Gazeta Shneta/