Një test i ri i urinës që mund të kryhet në shtëpi po konsiderohet si një përparim i rëndësishëm në diagnostikimin e kancerit të fshikëzës urinare në Britaninë e Madhe.
Testi, i quajtur GALEAS Bladder, po adoptohet gradualisht nga spitalet e sistemit shëndetësor britanik (NHS), duke ofruar një alternativë më të shpejtë, më të saktë dhe më pak invazive krahasuar me metodën tradicionale të diagnostikimit, shkruan The Guardian, transmeton Gazeta Shneta.
Aktualisht, diagnostikimi i kancerit të fshikëzës urinare realizohet kryesisht përmes cistoskopisë, një procedurë që përfshin futjen e një tubi me kamerë në traktin urinar për të ekzaminuar fshikëzën. Edhe pse konsiderohet standardi i artë për diagnostikim, procedura është invazive, shpesh shkakton parehati dhe në disa raste refuzohet nga pacientët.
Testi i ri kërkon vetëm një mostër urine, të cilën pacienti mund ta marrë në shtëpi dhe ta dërgojë për analizë. Ai funksionon duke analizuar ndryshimet në 23 gjene që lidhen me kancerin e fshikëzës urinare. Në një studim të realizuar në shtatë qendra të NHS-it në Britani, ku morën pjesë 964 pacientë, testi arriti një ndjeshmëri prej 92.2% dhe specifikë prej 92%, duke tejkaluar performancën e cistoskopisë, e cila në studime të mëparshme ka treguar saktësi rreth 81%.
Rezultatet ishin veçanërisht mbresëlënëse për format më agresive të sëmundjes. Studiuesit raportuan se testi identifikoi 97.2% të rasteve me kancer të gradës së lartë dhe kishte vlerë negative parashikuese prej 99.9%, që do të thotë se një rezultat negativ pothuajse përjashton praninë e sëmundjes.
Sipas mjekëve britanikë, përfitimet nuk kufizohen vetëm te saktësia. Të dhënat e para tregojnë se diagnostikimi mund të realizohet deri në 50% më shpejt sesa me procedurat tradicionale. Gjithashtu, më shumë pacientë po pranojnë të testohen, pasi procesi është i thjeshtë, pa dhimbje dhe nuk kërkon vizita të shumta në spital.
Deri tani, pesë spitale në Angli dhe Uells kanë filluar përdorimin e testit, ndërsa të paktën 16 institucione të tjera pritet ta adoptojnë atë gjatë këtij viti. Ekspertët e NHS dhe organizata si Cancer Research UK e kanë cilësuar teknologjinë si një hap të rëndësishëm drejt diagnostikimit më të hershëm të kancerit dhe përmirësimit të përvojës së pacientëve. /Gazeta Shneta/