Një tjetër sukses i rëndësishëm për mjekësinë dhe shkencën kosovare po shënohet në arenën ndërkombëtare.
Prof. Dr. Venera Berisha Muharremi po merr pjesë në ENDO 2026, Kongresin Vjetor të Endocrine Society, që po mbahet në Çikago të Shteteve të Bashkuara të Amerikës, një nga ngjarjet më prestigjioze globale në fushën e endokrinologjisë, përcjell Gazeta Shneta.
Në këtë kongres janë mbledhur mbi 7,000 shkencëtarë, studiues dhe mjekë nga vende të ndryshme të botës për të diskutuar zhvillimet më të fundit shkencore dhe për të kontribuar në formësimin e së ardhmes së mjekësisë moderne.
Si anëtare e Endocrine Society dhe përfaqësuese e Kosovës dhe Universitetit të Prishtinës, Prof. Dr. Berisha Muharremi do të prezantojë një punim shkencor kushtuar Photobiomodulimit, një metodë inovative që përdor teknologjinë laserike në trajtimin e sëmundjeve të tiroides.
Sipas saj, prezantimi i këtij hulumtimi në një forum kaq prestigjioz përbën një arritje të rëndësishme për mjekësinë kosovare dhe një mundësi të veçantë për të prezantuar inovacionin dhe potencialin shkencor të vendit para elitës globale të endokrinologjisë.
Prof. Dr. Berisha Muharremi ka shprehur gjithashtu mirënjohjen për bashkëpunëtorët e saj, duke theksuar se ky sukses është rezultat i punës së përbashkët dhe përkushtimit në avancimin e kërkimit shkencor dhe praktikave moderne mjekësore. /Gazeta Shneta/