Drejtori i Klinikës së Onkologjisë në QKUK, Dr. Ilir Kurtishi, ka publikuar një sërë këshillash për pacientët që janë në trajtim me kimioterapi gjatë ditëve të nxehta të verës.
Ai u bën thirrje pacientëve të qëndrojnë të hidratuar duke pirë ujë rregullisht gjatë gjithë ditës, edhe nëse nuk ndjejnë etje, ndërsa rekomandon të shmanget konsumimi i alkoolit dhe të kufizohen pijet me përmbajtje të lartë kafeine në rast se ato shkaktojnë dehidratim, përcjell Gazeta Shneta.
Po ashtu, pacientëve u rekomandohet të shmangin ekspozimin në diell, veçanërisht në intervalin kohor nga ora 11:00 deri në 17:00, si dhe të qëndrojnë në ambiente të freskëta ose me ajër të kondicionuar.
Gjatë daljes jashtë, këshillohet përdorimi i kapelës, syzeve të diellit dhe kremit mbrojtës me faktor SPF 30 ose më të lartë, pasi disa barna të kimioterapisë e bëjnë lëkurën më të ndjeshme ndaj rrezeve të diellit.
Në këshillat e tij, Dr. Kurtishi rekomandon gjithashtu veshjen e rrobave të lehta, të gjera dhe me ngjyra të çelëta, si edhe konsumimin e vakteve të vogla dhe ushqimeve të pasura me ujë, si fruta dhe perime të freskëta, sipas udhëzimeve të mjekut.
Ai thekson se nxehtësia mund ta përkeqësojë lodhjen e shkaktuar nga kimioterapia, ndaj pacientët duhet të pushojnë sa herë që ndihen të lodhur.
Një tjetër rekomandim i rëndësishëm është monitorimi i temperaturës së trupit. Nëse temperatura arrin 38 gradë Celsius ose më shumë, pacientët duhet të kontaktojnë menjëherë ekipin mjekësor, pasi ethet gjatë kimioterapisë mund të jenë shenjë e një infeksioni serioz.
Pacientët duhet të kërkojnë ndihmë mjekësore urgjente edhe në rast të marramendjes ose të fikëtit, vështirësive në frymëmarrje, konfuzionit, përgjumjes së pazakontë, të vjellave ose diarresë së vazhdueshme që pengojnë marrjen e lëngjeve, si dhe nëse shfaqin shenja të dehidratimit, si gojë e thatë, urinim i pakët ose urinë me ngjyrë shumë të errët.
Në fund, Dr. Kurtishi u bën thirrje pacientëve të mos ndryshojnë trajtimin dhe të mos shtyjnë seancat e kimioterapisë pa u konsultuar me onkologun, duke theksuar se çdo pacient është i ndryshëm dhe se për çdo simptomë të re ose shqetësim duhet të kontaktojnë mjekët e onkologjisë.